Mat 3 | DOB | STEP | Tuta gote 'enaya Yoni togiebapitaiso 'iapwesa sena mitawa daitaya sena Yudia solanaya ga 'iloguguya, 'igwaegwae,

Matthew 3

Yoni togiebapitaiso

(Maki 1:1-8; Luke 3:1-9, 15-17; Yoni 1:19-28)

1 Tuta gote 'enaya Yoni togiebapitaiso 'iapwesa sena mitawa daitaya ^{▼▼ *mitawa daita: Me Yudia 'idi mitawa kaukau be gulegulewa daisinamo, ta pwatula gidalina, be kaiwenao wate nigeya sinabwadi.} sena Yudia solanaya ga 'iloguguya, 'igwaegwae, 2 “'Imi bubuna to'umalina 'ediyega wada nuwa'ebuni manuna Yaubada 'iabe be 'edaya 'ietoloina.”

3 Palopita Aisea lowaenei gete Yoni nina manuna 'isimana, 'igwae,

“Tobwau 'ebweu sena mitawa daitaya 'enana sinabwana 'enega 'ida simana apwesa be 'ida gwae, ‘'Inapwana 'ina eda wada kakali ta wagiepaepalu.’”

4 Ta Yoni 'ana 'oama yobai kameli unuununa tuga, ta 'ana gadiwana kameli bwalana, ta 'ana masulao bilolo be mu'awa tuga.

5 Ta Yoni nina sena mitawa daitaya 'iloguloguguya ta me Yelusalema be Yudia 'ana tomiyanao be bwasi Yolidani tupitupinega 'ana tomiyanao yauyaudi sidelima Yoni 'enaya, 6 ga 'idi bubuna to'umalina sisimanedi, ta 'enega 'igiebapitaisoedi bwasi Yolidani 'enaya.

7 Ta Palisiyao ^{▼▼ *Palisiyao: Boda getedi taudi Mosese 'ina loinao 'adi muliya 'enaya sietapewa sinabwana, ga sinuwena 'aene taudimo totapwalolo 'ai'aila.} be Sadusiyao ^{▼▼ *Sadusyiyao: Boda getedi toesaesao ta tolonao Anuwa Tabu be tapwalolo 'ediya, ta esi nigeya siemiemisa 'aene tomota mayaluyaluwadi be toololimana be aniloseyao.} yaudi wate simai sabi bapitaiso, ga Yoni 'i'itedi ga 'ieonedi, 'igwae, “Tokabo 'omi nadigega mwata! Ta wanuwena 'aene 'iabe Yaubada 'ina gamwasowala 'enega wadedena, aga? 8 'Enega 'ilobwenemi be 'imi nuwa'ebuni 'ai'aila wada e'itaedi 'imi guinuwa bobo'adi 'ediyega. 9 Ta geya'abo wanuwanuwa laga manuna 'aene 'omi Ebelaamo tubunao, 'enega Yaubada 'ida 'atenuwa 'ole'oleyemi. Nigeya sa'i! Ta wa'ita Yaubada sawesawenaya be gulewa getedi 'ediyega Ebelaamo tubunao 'imweluluidi. 10 Ta 'abo 'imi bubuna nigeya bobo'adi 'iabe Yaubada 'ibwa'omatami, nadigega kaiwe, 'abo nigeya uwana bobo'ana tomota sitala yauledi be 'awesabelulu 'ena siuledi be sigabudi.

11 “'Eguma wanuwa'ebuni 'abo'agu bwasiyega yada giebapitaisoemi, ta sa'i ma'etamo 'ebweu tai muliguyega 'imeemai, tauna 'isinabwa sinegu, ta nigeya 'ilobwelobwenegu be manuna 'ana 'aelawa ya'aali. Ta tai nina 'iabe 'imama be Yaluyaluwa Tabuna, nadigega 'awesabelulu, 'enega 'ida giebapitaisoemi. 12 Ta tai gete 'ina inawega 'iabe witi 'ida sabutudi be uwana sisasagu be muliyega uwana bobo'adi 'iedodo 'ina anuwa masulaya, ta sumwasumwa nidi 'awesabelulu ataya 'ena 'igabudi.”v11 Yo 1:33; Gu 1:5

Yoni Yesu 'igie bapitaisoena

(Maki 1:9-11; Luke 3:21-22)

13 Tuta gote 'enaya Yesu sena Galili 'ipilisinena ga 'imai Yolidani, Yoni 'enaya, sabi bapitaiso. 14 'Enega Yoni nuwanuwana Yesu ma'iyana sida sa'ugelasa, ga 'igwae, “'Ilobwenena be 'oyo 'ugie bapitaisoegu, ta mwa'adega ga 'enega 'umai be 'aene 'abo'agu yada giebapitaisoeyo?”

15 Ta Yesu Yoni 'ina ona 'ie'isena, 'igwae, “Nigeya. Esi gete nadigega. 'Oyo 'uda giebapitaisoegu. Manuna gete 'enega loina maibo'adi bobo'adi tada muliyedi.”

16 'Enega Yoni 'itagwala ga Yesu 'igiebapitaisoena. Ta 'enega Yesu bwasiyega 'igayo'oya'ama, ta galewa 'i'egegena ta Yesu Yaubada Yaluyaluwana 'i'itena 'ana 'ita 'atuwa bunebune 'imwa'utama ga 'ena 'itowa. 17 Ta sa'i 'ebweu 'enana galewega 'ionama 'igwae, “Nate natu'ai'ailigu. Tauna manuna yagwausowala sinabwana.”